Bela domanda !

A voi no savemo,ma a noi dela Bora podessi corerne drio el mondo che noi se femo in parte e lo femo passar, perché partimo per ultimi e drio de noi no gavemo nessun.

A parte i scherzi noi pensemo che xè due risposte ala domanda chi te cori drio:

Chi ghe cori drio a chi?

Chi se la ciapa comoda ?

Ne gà piasso tutte e due e gavemo pensà de far un missiot.

Chi cori ?

Xè sempre un che scampa e un che ghe cori drio o per ciaparlo o per farse dar qualcosa.

Come quei sfigai che bevi e dopo va in auto e alora riva i puglioti che ghe cori drio ala sua patente.

Per esempio chi pol rapresentar un bevidor più de Andy Capp? El riva sempre casa carigo e su moglie ghe cori drio per darghe col matarel.

Cossa dir dela polvere? Xè sempre una baba col piumin che ghe cori drio per casa.

E pensè al povero Indiana Jones che el gaveva le piere che ghe coreva drio?

Anche tra le bestie no se scherza ,pensemo ale povere formighe col formichiere che ghe cori drio co la sua linguazza per magnarle?

Ma chi te cori drio più dela tua ombra? Ben che vadi te la gà sempre rente o drio de ti, se no la se meti in testa de far monade per conto suo .

E co xè la stagion chi più del scovazin ghe cori drio ale foie, poverete che le devi corer de qua e de là per no farse ciapar.

Anche el vento el ghe cori drio ai aquiloni che, però, inveze de scampar i ghe se poza sora.

Adesso pensemo a quei che se la ciapa comoda.

Chi xè più lento dele cagoie? Lore le va pian pianin cola caseta in schiena e no ghe importa de niente e de nessun.

Come le tartarughe che oltre che andar pian le se porta drio tutto quel peso.

Ala fine come vedè le robe che va pian xè pochete e anche sul caro xè un che scampa e un che ghe cori drio, ma no lo ciapa mai!

Bravi! Gavè capì che xè Bip Bip e Willy Coyote che più sfigà de lù no xè nessun. E anche qua de noi el corerà ma nol riverà mai a ciapar quel maledeto usel!

Bookmark/Search this post with:

 |   |   |   |   |   |   |